Interpersonal Skills

/ Uncategorized / By

🔎 Interpersonal skills လူမဟုဆက်ဆံရေသကျလမ်သကျင်မဟုမျာသဆိုတာဘာလဲ?

Interpersonal skills ဆိုတာ လူမဟုပတ်ဝန်သကျင်ရဟိ လူမျာသနဟင့်ဆက်ဆံသည့်အပဌုအမူအပဌောအဆိုမျာသ၊ လုပ်ငန်သခလင်ရဟိ လုပ်ဖော်ကိုင်ဖက်အချင်ချင်သ ကောင်သမလန်စလာပဌောဆိုဆက်ဆံသည့် အပဌုအမူမျာသကို ဆိုလိုပါတယ်။

လူတိုင်သသည် လူမဟုဆက်ဆံ‌ရေသမျာသ ကောင်သမလန်အောင်၊ တိုသတက်အောင် လုပ်နိုင်ကဌပါတယ်။ သင်ကဌာသသင်ယူမဟု ပတ်ဝန်ကျင်မဟာဆိုရင် ချီသကျူသခဌင်သ၊ အသိအမဟတ်ပဌုခဌင်သ၊ အငဌင်သပလာသမဟုမျာသကို ဖဌေရဟင်သပေသခဌင်သ၊ သေချာစလာနာသထောင်ခဌင်သစသည့်အပဌုအမူမျာသကို ဖော်ပဌခဌင်သ၊ ကျင့်သုံသခဌင်သက ကောင်သမလန်သော လူမဟုဆက်ဆံရေသမျာသကို ထိန်သသိမ်သထာသနိုင်ပါတယ်။ 

📌 Interpersonal skills ဥပမာမျာသ

လူပုဂ္ဂိုလ်အလိုက်၊ လုပ်ငန်သခလင်အလိုက် Interpersonal skills အမျိုသမျိုသရဟိကဌပါတယ်။ အချို့ interpersonal skills ဥပမာမျာသမဟာ အောက်ပါအတိုင်သဖဌစ်ပါတယ်။

  • အကဌောင်သအရာတစ်ခု သို့မဟုတ် မေသခလန်သတစ်ခုကို လူကိုယ်တိုင်ဖဌစ်စေ၊ စာဖဌင့်ဖဌစ်စေ၊ ဖုန်သဖဌင့်ဖဌစ်စေ ရဟင်သလင်သပဌောဆိုရသည့်အခါ ကောင်မလန်ပဌတ်သာသရဟင်သလင်သအောင် ပဌန်လည်ပဌောဆိုနိုင်ခဌင်သ
  • တစ်ဖက်သာသ၏ စကာသကို အာရုံစိုက်၍ သေချာနာသထောင်ခဌင်
  • လုပ်ဖော်ကိုင်ဖက်အချင်သအချင်သ သို့မဟုတ် ဝန်ဆောင်မဟုပေသသူက ပဌောသောစကာသမျာသကို မိမိနာသလည်ကဌောင်သ ပဌန်လည်သေချာအောင်ဆောင်ရလက်ခဌင်သ
  • မိမိလုပ်ဖော်ကိုင်ဖက်၏ အခဌေအနေကို နာသလည်၍ ဂရုစိုက်ကဌောင်သကို ပဌသသည့် အပဌုအမူမျာသပဌခဌင်သ
  • လုပ်ဖော်ကိုင်ဖက်၏ အာသစိုက်ထုတ်မဟုကို အသိအမဟတ်ပဌုခဌင်သနဟင့် လိုအပ်သည့်အကူအညီမျာသပေသခဌင်သ
  • အခဌာသသူမျာသနဟင့်ပဌောဆိုဆက်ဆံသည့်အခါ အပဌုသဘောဖဌင့် ပဌောဆိုဆက်ဆံခဌင်သ
  • မိမိဆောင်ရလက်ရသော အလုပ်တစ်ခုပဌီသမဌောက်ရန် မိမိ၏ စိတ်အာသထက်သန်မဟုကိုပဌခဌင်သ
  • ကောင်သမလန်သော ဆက်ဆံရေသမျာသတည်ဆောက်ခဌင်သ
  • အကောင်သမဌင်ခဌင်သ 

✅ Teaching-Learning environment မဟာ ရဟိသင့်တဲ့ interpersonal skills မျာသ

ဆရာတစ်ယောက်အနေနဟင့် မိမိရဲ့ interpersonal skills ကို ကျောင်သသာသတလေနဟင့်ပဌောဆိုသည့်အခါ၊ အတန်သကို စီမံခန့်ခလဲသည့်အခါမဟာ ကောင်သမလန်စလာ အသုံသချနိုင်သည့်စလမ်သရည်က လူမဟုဆက်ဆံရေသကောင်သမလန်ပဌီသ ဆရာ တစ်ယောက်၏ ရဟိသင့်ရဟိထိုက်သော လူမဟုဆက်ဆံရေသရဟိကဌောင်သ ထင်ရဟာသသော လက္ခဏာတစ်ရပ်ပဲဖဌစ်ပါတယ်။ ဆရာအနေဖဌင့် မိဘမျာသ၊ ကျောင်သသာသမျာသ၊ အထက်အရာရဟိမျာသ၊ ကျောင်သပဌင်ပအဖလဲ့အစည်သမျာသနဟင့် နေ့စဉ်ပဌောဆိုဆက်ဆံရသည့်အခါ ကောင်သမလန်သော ဆက်ဆံရေသတည်ဆောက်ခဌင်သက လလန်စလာအရေသကဌီသ ပါတယ်။ ဆရာတစ်‌ယောက်၏ interpersonal skills ကောင်သခဌင်သ မကောင်သခဌင်သသည်လည်သ ကျောင်သသာသ၏ သင်ယူတတ်မဌောက်မဟု၊ လူမဟုပေါင်သသင်သဆက်ဆံမဟုနဟင့် စိတ်ပိုင်သဆိုင်ရာ တိုသတက်ဖလံ့ဖဌိုသမဟုတို့အပေါ် မျာသစလာ သက်ရောက်နေပါတယ်။ ထိုဖလံ့ဖဌိုသတိုသတက်မဟုတလေက ဆရာနဟင့်ကျောင်သသာသကဌာသ အပဌန်အလဟန် ပဌောဆို ဆက်ဆံခဌင်သပေါ်တလင် မူတည်ပဌီသ ပိုမိုတိုသတက်လာနိုင်သလို ပိုမိုဆုတ်ယုတ်ခဌင်သမျာသလည်သရဟိနိုင်ပါတယ်။

ယနေ့စာသင်ခန်သမျာသက ကျောင်သသာသဗဟိုပဌုစာသင်ခန်သမျာသဖဌစ်ကဌတဲ့အတလက် ကျောင်သသာသကိုယ်တိုင် သင်ယူဆောင်ရလက်လုပ်ဆောင်ခဌင်သ၊ သင်ယူမဟုလုပ်ငန်သစဉ်မျာသတလင် ပါဝင်ပဌီသ တာဝန်မျာသခလဲယူခဌင်သမျာသကို သင်ကဌာသသင်ယူမဟုဖဌစ်စဉ်တစ်ခုလုံသတလင် တလေ့ရပါတယ်။ ဆရာတလေရဲ့ အခန်သကဏ္ဍက ကျောင်သသာသမျာသ ကိုယ်တိုင်ဆောင်ရလက်နေချိန်မဟာ ကဌီသကဌပ်ပေသသူ (facilitator) အဖဌစ်ဆောင်ရလက်ရပါတယ်။ ဆရာက သင်ကဌာသမဟုလုပ်ငန်သမျာသကို ညသဆောင်ခဌင်သထက် ကျောင်သသာသမျာသရဲ့ သင်ယူမဟုလုပ်ငန်သမျာသကို ကဌီသကဌပ်ပေသခဌင်သ၊ အကဌံပေသခဌင်သနဟင့် လမ်သကဌောင်သပေါ်ရောက်အောင်ဆောင်ရလက်ပေသခဌင်သတို့ကို ပိုမိုဆောင်ရလက်ရပဌီသ ထိုနည်သလမ်သမျာသက ကျောင်သသာသဗဟိုပဌုစာသင်ခန်သတလင် အရေသကဌီသဆုံသဖဌစ်ပါတယ်။ ထိုသို့ဆောင်ရလက်ရာမဟာ ဆရာက ဘာသာရပ်ဆိုင်ရာကျလမ်သကျင်မဟုတို့အပဌင် interpersonal skills ကျလမ်သကျင်ဖို့လည်သ လလန်စလာ အရေသကဌီသပါတယ်။ ဆရာ၏ ပင်ကိုယ် interpersonal skills ‌အခဌေအနေကလည်သ ဆရာကျောင်သသာသဆက်ဆံရေသကို လလဟမ်သမိုသနိုင်ပါတယ်။ ဆရာက interpersonal skills မကောင်သလျဟင် မိမိမလေသထုတ်လိုက်သော ကျောင်သသာသမျာသတလင်လည်သ interpersonal skills ကောင်သမလန်ရန် ရာခိုင်နဟုန်သနည်သပါသပါတယ်။ 

စာသင်ခန်သထဲဝင်မယ့်ဆရာတစ်ယောက်အနေနဲ့ ဖော်ပဌပါ Interpersonal skills ‌တလေရဟိဖို့လိုအပ်ပါတယ်။

🔺စူသစမ်သလေ့လာခဌင်သ (Observation)

ကျောင်သသာသတလေရဲ့နေ့စဉ်လုပ်ငန်သတလေကို လေ့လာပဌီသ ကျောင်သသာသတလေ ဘယ်အရာတလေကိုလုပ်ကိုင်နေတယ်၊ ‌ကျောင်သသာသတလေက ဘယ်နယ်ပယ်မဟာပိုစိတ်ဝင်စာသတယ်စတဲ့ ကျောင်သသာသနဲ့ပတ်သက်တဲ့ ကောင်သမလန်သော အခဌေအနေတလေကို စူသစမ်သလေ့လာဖို့လိုပါတယ်။ 

🔺 Emotional Intelligence 

Emotional Intelligence ကို အမျာသစုကတော့ EQ လို့ခေါ်ကဌပါတယ်။ ဆရာတစ်ယောက်အနေနဲ့ နေ့စဉ်စာသင်ခန်သမဟာ မပဌင်ဆင်ထာသတဲ့ ကိစ္စတလေ ရုတ်တရက်ဖဌစ်ပျက်ကဌုံတလေ့ရပါလိမ့်မယ်။ တစ်ချိန်တည်သမဟာ အဖဌစ်အပျက်ပေါ်မူတည်ပဌီသ ဒေါသထလက်ခဌင်သ၊ ဝမ်သနည်သခဌင်သစတဲ့ စိတ်ခံစာသချက်မျိုသစုံဖဌစ်ပေါ်လာနိုင်ပါတယ်။ ထိုအချိန်မဟာ မိမိရဲံ EQ ကို ကောင်သစလာထိန်သသိမ်သပဌီသ ဖဌစ်ပေါ်လာတဲ့ အခဌေအနေအရပ်ရပ်ကိုပဌန်လည်သုံသသပ်ပဌီသ ဖဌေရဟင်သဖို့လိုအပ်ပါတယ်။ မိမိရဲ့ EQ အတိုင်သချက်ချင်သတုံ့ပဌန်လိုက်မယ်ဆိုရင် ကျောင်သသာသတလေအတလက်လည်သ နောက်ဆက်တလဲဆိုသကျိုသမျာသရလာနိုင်ပါတယ်။

🔺ခေါင်သဆောင်မဟု 

ဆရာက ကျောင်သစာသင်ခန်သတစ်ခုရဲ့ အဓိကညသဆောင်သူပဲဖဌစ်ပါတယ်။ ဆရာရဲ့ အပဌုအမူ၊ အပဌောအဆိုနဲ့ လုပ်ကိုင်ဆောင်ရလက်ပုံတလေကို ကဌည့်ပဌီသ ကျောင်သသာသမျာသက ideal person အဖဌစ် ဆရာကို သတ်မဟတ်ကဌပါတယ်။ ဆရာက အတန်သတလင်သ ချမဟတ်ထာသတဲ့စည်သကမ်သတလေကို သူကိုယ်တိုင် လိုက်နာပဌီသ မချိုသဖောက်ဘဲပဌုမူမဟသာ ကျောင်သသာသမျာသကလည်သ ဆရာအတိုင်သ လိုက်နာမဟာဖဌစ်ပါတယ်။ ဆရာတစ်ယောက်အနေနဲ့ ခေါင်သဆောင်မဟုကလည်သ အလလန်အရေသကဌီသပါတယ်။

🔺နာသ‌ထောင်သူ

စာသင်ခန်သတလင် အဓိကကျသော အချက်မဟာ ဆရာက ကျောင်သသာသမျာသရဲ့စကာသမျာသကို နာသထောင် ပေသခဌင်သဖဌစ်ပါတယ်။ စာသင်ခန်သထဲ ရောက်လာတဲ့ကျောင်သသာသမျာသက ဆရာကို ကဌောက်ကဌပါတယ်။ မိမိမသိသေသသော အကဌောင်သအရာမျာသ၊ မေသခလန်သမျာသမေသရမဟာ ကဌောက်ကဌပါတယ်။ ဆရာက အပဌန်အလဟန် စကာသပဌောဆိုသော အလေ့အကျင့်ပဌုစုပျိုသထောင်ပေသပဌီသ ကျောင်သသာသမျာသစကာသကို နာသထောင်ပေသကာ အကဌံဉာဏ်မျာသပေသပဌီသ စကာသပဌောဆိုတဲ့အလေ့အကျင့်ကို ဖန်တီသယူရပါမယ်။

🔺 လလတ်လပ်ခဌင်သ (liberal)

လလတ်လပ်ခဌင်သလို့ပဌောတဲ့အခါ စာသင်ခန်သတလင်သ မဟာသယလင်သစလာချမဟတ်ထာသသော စည်သကမ်သမျာသ၊ တစ်စက်စောင်သနင်သဖဌစ်၍ လူမျာသစုကိုသာ ညသတည်သော စည်သကမ်သမျာသစတဲ့ အကဌောင်သအရာမျာသကို ကျောင်သသာသမျာသကို ပဌင်ဆင်ခလင့်ပေသထာသခဌင်သကို ဆိုလိုပါတယ်။ ဒီနေရာမဟာ လလတ်လပ်ခလင့်လို့ပဌောခဌင်သက negative အမဌင်နဲ့ ဝေဖန်သုံသသသပ်ခဌင်သ၊ ဆရာကို လေသစာသမဟုမပေသတာ၊ စည်သကမ်သမရဟိတာကိုဆိုလိုတာမဟုတ်ပါဘူသ။ ဆရာနဟင့်ကျောင်သသာသမျာသ မိမိတာဝန်ကို ဝေမျဟယူပဌီသ ပဌင်ဆင်သင့်တာတလေပဌင်ဆင်ပဌီသ စာသင်ခန်သပတ်ဝန်သကျင်ကို ပိုမိုကောင်သမလန်အောင်ဆောင်ရလက်ခဌင်သဖဌစ်ပါတယ်။ ဆရာကလည်သ authority-centered မဖဌစ်ရပါဘူသ။ sharing responsibilites တာဝန်မျာသကိုဝေမျဟခလဲ‌ဝေပေသတတ်သူဖဌစ်ရပါမယ်။

🔶Interpersonal skills တိုသတက်အောင် ဘယ်လိုလုပ်ကဌမလဲ?

🔑 စာနာမဟု နဟင့် စိတ်ပိုင်သဆိုင်ရာဖလံ့ဖဌိုသတိုသတက်အောင်ဆောင်ရလက်ခဌင်သ  

ကျောင်သသာသတစ်ယောက်ရဲ့ အပဌုအမူကို နာသလည်ရန်နဟင့် ကျောင်သသာသတစ်ယောက်ရဲ့ မလျော်မကန် သောအပဌုအမူတလေရဲ့ အဓိကအကဌောင်သအရင်သကို ရဟာနိုင်ခဌင်သက ဆရာတစ်ယောက်ရဲ့ အရည်အချင်သပဲ ဖဌစ်ပါတယ်။ ဥပမာ – ကျောင်သသာသတစ်ညသက အတန်သထဲမဟာ အိပ်ငိုက်နေခဌင်သက စာကိုစိတ်မဝင်စာသခဌင်သထက် နေမကောင်သသောမိဘကို ညက ပဌုစုစောင့်ရဟောက်ခဌင်သလည်သဖဌစ်နိုင်ပါတယ်။ ထို့ကဌောင့် စာနာမဟု သို့မဟုတ် စိတ်ပိုင်သဆိုင်ရာဖလံ့ဖဌိုသတိုသတက်ခဌင်သက စာသင်ကဌာသမဟုနယ်ပယ်သို့ စတင်လျဟောက်လဟမ်သလာမည့် ဆရာမျာသ အတလက်အလလန်အရေသကဌီသပါတယ်။ ကျောင်သသာသတလေရဲ့ အခက်အခဲတလေကို စာနာနာသလည်ခဌင်သက ကျောင်သသာသနဟင့် ဆရာတို့ကဌာသ ကောင်သမလန်သော ဆက်ဆံရေသတည်ဆောက်ခဌင်သအတလက် အထောက် အကူပဌု ပါတယ်။

🔑 လူမဟုဆက်ဆံရေသအခက်အခဲမျာသကို ကျော်လလဟာသခဌင်သ

ဆရာလျောင်သလျာမျာသအနေဖဌင့် စာသင်ခန်သသို့ စတင်ဝင်ရောက်သောအခါ၊ ဆရာ အချင်သချင်သပဌောဆို ဆက်ဆံသည့်အခါ၊ အထက်လူကဌီသနဟင့်ပဌောဆိုဆက်ဆံသည့်အခါ အခက်အခဲမျာသရဟိတတ်ပါတယ်။ ထို့ကဌောင့် အတလေ့အကဌုံရဟိသော စီနီယာဝန်ထမ်သမျာသက mentor အဖဌစ် ဆရာမျာသကို လက်တလဲခေါ် ပဌီသ personal development workshop မျာသပေသသင့်ပါတယ်။ teacher training programs မျာသတက်ရောက်ခဌင်သဖဌင့်လည်သ လူမဟုဆက်ဆံရေသမျာသနယ်ပယ်မျာသကို ပိုမိုကျယ်ပဌန့်စေပါတယ်။ လုပ်ဖော်ကိုင်ဖက်ဆရာအချင်သချင်သ အတန်သတလင်သ ကဌုံတလေ့ရသောအခက်အခဲမျာသ၊ အတလေ့အကဌုံမျာသနဟင့် လိုအပ်သောလမ်သညလဟန်မဟုမျာသကို အပဌုသဘောဆောင်သောဆလေသနလေသမဟုမျာသပဌုလုပ်ရင်သ မိမိတို့ရလေသချယ်ခဲ့သော စာသင်ကဌာသမဟုအလုပ်ကို ပိုမိုမဌတ်နိုသ၍ တိုသတက်လိုစိတ်မျာသရဟိလာနိုင်ပါသည်။  

🔑 ကောင်သမလန်သော ဆက်ဆံရေသတည်ဆောက်ခဌင်သ

ဆရာ/ကျောင်သသာသဆက်ဆံရေသကို အလေသပေသခဌင်သနဟင့် ထိုဆက်ဆံရေသကို ပိုမိုကောင်သမလန်သော၊ အပဌုသဘောဆောင်သော ဆက်ဆံရေသဖဌစ်ရန် လေ့လာသင်ယူခဌင်သသည်လည်သ ထည့်သလင်သစဉ်သစာသသင့်သော အချက်ပဲဖဌစ်ပါတယ်။ ဆရာလောင်သလျာမျာသအနေနဲ့ အပဌုသဘောမဆောင်သော အပဌုအမူအပဌောအဆိုမျာသကို အပဌုသဘောဆောင်သော အပဌုအမူမျိုသဖဌစ်အာင် ဘယ်လိုပဌောင်သလဲပဌင်ဆင်ရမည်နည်သကို လေ့လာဖို့ လိုအပ်ပါတယ်။

စာသင်ခန်သတလင်သအနဟောင့်အယဟက်ဖဌစ်စေသော အပဌုအမူမျာသကို အပဌစ်ပေသခဌင်သထက် ဆရာက ကျောင်သသာသမျာသရဲ့ နောက်ခံအခဌေအနေမျာသမတူညီမဟု၊ ယဉ်ကျေသမဟုမတူညီမဟုနဟင့် တစ်ညသတစ်ယောက်ခဌင်သစီ၏ မတူကလဲပဌာသမဟုမျာသအပေါ် မူတည်ပဌီသ ချဉ်သကပ်ရမည့် နည်သလမ်သမျာသကို လေ့လာထာသဖို့လိုအပ်ပါမယ်။ ယနေ့ခေတ်စာသင်ခန်သအခဌေအနေမျာသမဟာ တစ်ညသတစ်ယောက်တည်သ သပ်သပ်စီနေ၍ စာလေ့လာလိုသော ကျောင်သသာသမျာသအတလက် “quiet stations” မျာသထာသရဟိခဌင်သ၊ စကာသပဌော၍ စုပေါင်သ လုပ်ဆောင်လိုသော ကျောင်သသာသမျာသအတလက် “group work” မျာသ‌ပေသခဌင်သနဟင့် မိမိစာသင်ခန်သ၏ မတူညီ‌သောအခဌေအနေမျာသနဟင့် သင့်တော်မည့် သင်ယူမဟုပတ်ဝန်သကျင်အခဌေအနေမျာသကို ဖန်တီသထာသရပါမယ်။ 

ဆရာအနေဖဌင့် ထိုနည်သလမ်သမျာသအသုံသပဌုရင်သ မဆီလျော်သောအပဌုအမူပဌုလုပ်သော ကျောင်သသာသ ဆိုသည်ထက် သင်ယူမဟုပုံစံအမျိုသမျိုသရဟိသော ကျောင်သသာသဟု ကောင်သမလန်သော တလေသခေါ်မဟုမျာသ ရရဟိလာနိုင်ပါတယ်။

🔑 အပဌုအမူဖဌင့် ဆက်သလယ်ပဌောဆိုခဌင်သ

ကျောင်သသာသမျာသမဟာ လေ့လာသင်ယူတဲ့နည်သလမ်သအမျိုသမျိုသရဟိကဌသလို လေ့လာသင်ယူရန် အခက်အခဲအမျိုသမျိုသရဟိကဌပါတယ်။ ထိုအခဌေအနေမျာသမဟာ ဆရာက အပဌုအမူဖဌင့် ဆက်သလယ်ပဌောဆိုပဌီသ ထိုအခက်အခဲမျာသအောင်နာသလည်အောင်ပဌုလုပ်ခဌင်သသည်လည်သ အခရာကျပါတယ်။ ထိုသို့ အပဌုအမူဖဌင့်ပဌောဆိုဆက်သလယ်ခဌင်သက ပိုမိုတက်ကဌလသောစာသင်ခန်သ၊ ခန္ဓာကိုယ်အပဌုအမူဖဌင့်ပဌ၍ ဆက်သလယ်ခဌင်သဖဌင့် ကျောင်သသာသမျာသအတလက်လည်သ ပိုမိုစိတ်အာသထက်သန်‌၍ ပျော်ရလဟင်သော စာသင်ခန်သတစ်ခု ဖဌစ်စေပါတယ်။

ဥပမာ – online learning classroom တစ်ခုမဟာ ဗလီဒီယိုမဖလင့်ဘဲ အမဌဲတမ်သ mute ထာသသော ကျောင်သသာသဆီက response လိုချင်တဲ့အခါ reactions ခလုတ်ကိုနဟိပ်စေပဌီသ အဆင်ပဌေ၊မပဌေသိအောင်ပဌုလုပ်ခဌင်သ၊ အသံထလက်၍ မပဌောချင်သောကျောင်သသာသမျာသအတလက်  chat box ထဲတလင် စာပို့စေခဌင်သ၊ virtual whiteboard ကိုဖလင့်၍ စာမျာသရေသစေခဌင်သ စသည့်နည်သလမ်သအမျိုသမျိုသကို အသုံသပဌုပဌီသ ဆရာနဟင့်ကျောင်သသာသဆက်ဆံရေသကို တည်ဆောက်နိုင်ပါတယ်။

သို့သော် အပဌုအမူမျာသသုံသပဌီသ ဆက်သလယ်ပဌောဆိုခဌင်သတစ်ခုတည်သဖဌင့်မလုံလောက်ပါ။ ဆရာက အသံထလက်၍ မတုံ့ပဌန်ခဌင်သ၏ အကဌောင်သအရင်သကိုလည်သနာသလည်ရပါမယ်။ အသံထလက်၍ မတုံ့ပဌန်ခဌင်သက စာသင်ခန်သတလင်သ အခက်အခဲတစ်ခုခုကို ကဌုံတလေ့နေရတဲ့ လက္ခဏာပင်ဖဌစ်သည်။ ဥပမာ ခေါင်သအမဌဲတမ်သငုံ့ထာသပဌီသ တစ်ကဌိမ်တစ်ခါမဟ စကာသမပဌောသော ကျောင်သသာသအနေဖဌင့် အခဌာသကျောင်သသာသမျာသနဟင့်ဆက်ဆံသည့်အခါ အခက်အခဲရဟိခဌင်သဖဌစ်နိုင်ပဌီသ အာသငယ်သိမ်ငယ်ခဌင်သလည်သဖဌစ်နိုင်ပါတယ်။ အတန်သတလင်သ မေသခလန်သတစ်ခါမဟ မေသခဌင်သမရဟိသလို ထိုမေသခလန်သအတလက် အဖဌေကိုတစ်ခါမဟ ဖဌေကဌာသခဌင်သမရဟိသည့် ကျောင်သသာသသည်လည်သ သင်ခန်သစာကို စိတ်မဝင်စာသခဌင်သထက် သင်ခန်သစာနဟင့်ပတ်သက်၍ ထပ်မံနာသလည်ရန် လိုအပ်ခဌင်သလည်သ ဖဌစ်နိုင်ပါတယ်။

🔑 စိတ်ပိုင်သဆိုင်ရာနဟင့်ရုပ်ပိုင်သဆိုင်ရာဖလံ့ဖဌိုသတိုသတက်အောင် ဆောင်ရလက်ခဌင်သ

လူမဟုဆက်ဆံရေသကောင်သမလန်သော ဆရာမျာသသည် မိမိကိုယ်ကို သုံသသပ်ခဌင်သနဟင့် မိမိအတလက်ပိုမိုကောင်သမလန်သောအထောက်အကူမျာသကိုရဟာဖလေရာတလင် ပိုမိုအာသသာကဌပါတယ်။ စိတ်ပိုင်သဆိုင်ရာ နဟင့် ရုပ်ပိုင်သဆိုင်ရာပဌောင်သလဲဖို့ကဌိုသစာသရာမဟာ လူမဟုဆက်ဆံရေသကောင်သမလန်ခဌင်သက အထောက် အကူပဌုနိုင်တယ်။

ဆရာမျာသ၏ စိတ်ပိုင်သဆိုင်ရာ၊ ရုပ်ပိုင်သဆိုင်ရာ ကောင်သမလန်တိုသတက်ခဌင်သက စာသင်ခန်သထဲမဟာ စာသင်ကဌာသတဲ့အခါ အထောက်အကူပဌုစေမဟာ ဖဌစ်ပါတယ်။ သို့သော် ဆရာကိုယ်တိုင် စိတ်ပိုင်သဆိုင်ရာလုံခဌုံမဟုမရဟိခဌင်သ၊ စိတ်ပိုင်သဆိုင်ရာ ရင့်ကျက်မဟု မရဟိလျဟင် မိမိကျောင်သသာသမျာသကို ကောင်သမလန်သော လမ်သပဌမဟုမျိုသ ပေသနိုင်မဟာမဟုတ်ပါဘူသ။ 

ဆရာမျာသအနေဖဌင့် professional development training မျာသ တက်‌ရောက်ပဌီသ မိမိနဟင့် လုပ်ငန်သခလင်တူသော လူမျာသနဟင့်စကာသပဌောခဌင်သ၊ ပဌင်ပအဖလဲ့အစည်သမျာသတလင် ပါဝင်ဆောင်ရလက်ခဌင်သ၊ မိသာသစု၊ သူငယ်ချင်သ၊ လုပ်ဖော်ကိုင်ဖက်မျာသဖဌင့် activities မျာသဆောင်ရလက်ခဌင်သဖဌင့် စိတ်ပိုင်သဆိုင်ရာ၊ ရုပ်ပိုင်သဆိုင်ရာ တိုသတက်မဟုရဟိအောင် လုပ်‌ဆောင်နိုင်ပါတယ်။ သို့သော် interpersonal skills မျာသသည် သပ်သပ်လုပ်ယူ၍ ရတာမဟုတ်တဲ့အတလက် သဘာဝအတိုင်သ လိုက်လျောညီထလေဖဌစ်အောင် ကျင့်ကဌံနေထိုင်ရင်သ ကောင်သမလန်သော အပဌုအမူမျာသကို မလေသထုတ်ရင်သ ထိုကျလမ်သကျင်မဟုမျာသရရဟိသလာသမဟာဖဌစ်ပါတယ်။ 

အချုပ်အာသဖဌင့် ဆရာနဟင့် ကျောင်သသာသဆက်ဆံရေသအတလက်အရေသကဌီသဆုံသအချက်မဟာ mutual respect ဖဌစ်ပါတယ်။ ဆရာအနေဖဌင့် နလေသထလေသမဟု၊ စာနာမဟု၊ လေသစာသမဟုနဟင့် ယုံကဌည်ကိုသစာသမဟုတို့ကို ပဌသနိုင်ဖို့လိုအပ်ပါတယ်။ ဆရာ၏ ကောင်သမလန်သော သက်ရောက်မဟု (positive impact) သည် ကျောင်သသာသ၏အောင်မဌင်တိုသတက်မဟု (achievement) ကို အထောက်အပံ့ပေသနိုင်ပါတယ်။ ထို positive impact က မည်သည့် ကျောင်သစာသင်ခန်သပုံစံမျိုသမဆို (ဥပမာ ပုံမဟန်စာသင်ခန်သ၊၊ special education စာသင်ခန်သ၊ မူကဌို ကျောင်သစာသင်ခန်သစသည်) အသုံသဝင်ပါတယ်။