ပူးပေါင်းလုပ်ဆောင်ခြင်း (Collaboration) ဆိုတာ လူနှစ်ယောက် သို့မဟုတ် နှစ်ယောက်ထက်ပိုသော လူများနှင့် ပရောဂျက်တစ်ခု၊ အလုပ်တစ်ခု သို့မဟုတ် သင်ရိုးညွှန်းတမ်းတစ်ခု သို့မဟုတ် မေးခွန်းတစ်စုံကို အကောင်အထည်ဖော် လုပ်ဆောင်ခြင်း ဖြစ်ပါတယ်။ တစ်နည်းအားဖြင့် ပူးပေါင်းဆောင်ရွက်ခြင်းစွမ်းရည် (Collaboration Skills) ဆိုတာက မိမိကိုယ်မိမိ သိနားလည်သော စွမ်းရည် (Intrapersonal Skills) ရှိပြီး အဖွဲ့၏ ဘုံရည်မှန်းချက်ကို အောင်မြင်အောင် လူအများနှင့် ပူးပေါင်းဆောင်ရွက်နိုင်သော စွမ်းရည်ဖြစ်ပါတယ်။
လုပ်ငန်းခွင် သို့မဟုတ် သင်ကြားရေးမှာ ပူးပေါင်းလုပ်ဆောင်ခြင်းဆိုတာ အဖွဲ့အစည်း သို့မဟုတ် ဌာန သို့မဟုတ် ကျောင်းကို အကျိုးပြုစေမယ့် တူညီတဲ့ ရည်မှန်းချက်တစ်ခုကို ရောက်အောင် လုပ်ဆောင်ရခြင်းပဲဖြစ်ပါတယ်။ လုပ်ငန်းခွင်အတွင်း ပူးပေါင်းလုပ်ဆောင်ခြင်းသည် အများနှင့် ဆက်သွယ်ဆောင်ရွက်နိုင်သောစွမ်းရည် (interpersonal skills)၊ ပေါင်းသင်းဆက်ဆံနိုင်တဲ့ အရည်အချင်း၊ ဗဟုသုတမျှဝေခြင်း တို့လိုအပ်ပြီး ကျောင်းတွင်းသော်လည်းကောင်း အွန်လိုင်းကနေသော်လည်းကောင်း လုပ်ဆောင်နိုင်ပါတယ်။
💠Collaboration Skill ကဘာကြောင့် အရေးကြီးတာလဲ။
မတူကွဲပြားသော အဖွဲ့ဝင်များ၏ စိတ်နေစိတ်ထား၊ အမြင်များ၊ အယူအဆများအားလုံးကို သဟဇာတဖြစ်အောင် ပေါင်းစပ်ညှိနှိုင်း၍ အဖွဲ့၏ ရည်မှန်းချက်ကို အောင်မြင်အောင် ဆောင်ရွက်နိုင်ရန်မှာ အဖွဲ့ဝင်အားလုံးတွင် အများနှင့် ပူးပေါင်းဆောင်ရွက်နိုင်သော စွမ်းရည်ရှိနေရန် လိုအပ်ပါတယ်။ ပူးပေါင်းဆောင်ရွက်ခြင်းသည် အဖွဲ့ဝင်များအချင်းချင်း အစည်းအဝေးများတွင် စုဝေးတွေ့ဆုံရုံ၊ မိမိအလုပ်တာဝန်များကို ကိုယ်စီခွဲဝေဆောင်ရွက်ရုံပဲ မဟုတ်ပါဘူး။ အဖွဲ့ဝင်အချင်းချင်း သိနားလည်မှု၊ ကူညီပံ့ပိုးမှု၊ အပေးအယူမျှမှု၊ ဆက်သွယ်ပူးပါင်းဆောင်ရွက်မှု စွမ်းရည်များကြောင့်သာ လုပ်ငန်းများ အောင်မြင်စွာ လည်ပတ်နိုင်တာဖြစ်ပါတယ်။ ဒါကြောင့် ပူးပေါင်းပါဝင်ဆောင်ရွက်ခြင်းစွမ်းရည်က အရေးကြီးပါတယ်။
💠Collaborationပူးပေါင်း လုပ်ဆောင်နိုင်တဲ့ အရည်အချင်းကောင်းလာစေဖို့ ဘာတွေလိုအပ်လဲ။
ပူးပေါင်း လုပ်ဆောင်နိုင်တဲ့ အရည်အချင်းကောင်းလာစေဖို့ လုပ်ဆောင်သင့်တဲ့ အရာတွေကတော့ အောက်ပါ အတိုင်းဖြစ်ပါတယ်။
(၁) ရည်မှန်းချက် ဦးတည်ချက်ကို ရှင်းရှင်းလင်းလင်းချမှတ်ပါ။ (Clear Goals and Objectives)
လုပ်ငန်းခွင်ထဲမှာ တစ်ယောက်နဲ့ တစ်ယောက်ပူးပေါင်းပြီး ပရောဂျက်တစ်ခုကိုလုပ်ဆောင်တဲ့အခါ အဓိကရည်ရွယ်ချက်၊ ရရှိလိုတဲ့ ဦးတည်ချက်က ဘာလဲ ဆိုတာကို ပါဝင်သူအားလုံး ရှင်းရှင်းလင်းလင်း သိရှိဖို့ လိုအပ်ပါတယ်။ ဒီလိုသိရှိမထားရင် အချိန်ကုန်ပြီးအလုပ်မဖြစ်နိုင်ပါဘူး။ ရှင်းရှင်းလင်းလင်း သိရှိထားခြင်းဖြင့် ပွင့်လင်းမြင်သာမှုရှိစေပြီး အချင်းချင်းကြားမှာလည်း ယုံကြည်မှုတည်ဆောက်နိုင်ပါတယ်။ ဒါ့အပြင် ပူးပေါင်းလုပ်ဆောင်မှုတွေ အောင်မြင်ပြီး လိုချင်တဲ့ပန်းတိုင်ကိုလည်း ရောက်ရှိနိုင်မှာပါ။
(၂) အဖွဲ့ဝင်များနှင့်အပြန်အလှန်ဆက်သွယ်ဆောင်ရွက်ခြင်း။ (Communication)
အခြားသူနဲ့ပူးပေါင်းလုပ်ဆောင်တဲ့အခါမှာ ကိုယ်ဘာတွေလုပ်နေသလဲ ကိုယ်လုပ်နေတာတွေက သတ်မှတ်ချိန်အတွင်းပြီးနိုင်မပြီးနိုင်ကိုလည်း အမြဲပြောပြထားဖို့လိုအပ်ပါတယ်။ ဒါမှသာ မလိုလားအပ်တဲ့ အထင်လွဲ မှားမှု တွေမဖြစ်မှာပါ။ လုပ်ဖော်ကိုင်ဖက်များနှင့် ဆက်သွယ်တဲ့အခါ သူတို့ ဆက်သွယ်ဖို့ အားသန်တဲ့ နည်းလမ်းများကို အသုံးပြုပါ။ အချို့တွေက စာဖြင့်ရေးသားဆက်သွယ်ရတာကို သဘောကျပေမယ့် တချို့အတွက်တော့ စကားပြောနဲ့ ဆက်သွယ်တာကို ပိုပြီးနှစ်သက်ကြပါတယ်။ လူတိုင်းကို သူတို့ရဲ့အမြင်အား လွတ်လပ်စွာ ဆက်သွယ်ပြောဆိုခွင့်ပေးပါ။ တစ်ယောက်ယောက်က သူတို့ရဲ့အမြင်ကို ချပြဖို့ တွန့်ဆုတ်နေမယ်ဆိုရင် သူတို့ရဲ့ အမြင်ကို နားလည်အောင် ကြိုးစားအားထုတ်ပါ။ လူတိုင်းကို ဆက်သွယ်ပြောဆိုမှုအားကောင်းလာအောင် ကူညီဖို့ဆိုတာ ခက်ခဲပါတယ်၊ ဒါပေမယ့် သူတို့ကို သက်တောင့်သက်သာရှိအောင် ဆောင်ရွက်ပေးနိုင်လျှင် သူတို့က ပိုမို ဆက်သွယ်လာမှာဖြစ်ပါတယ်။
(၃) နားထောင်ပါ။ သင်ယူပါ။ ညှိနှိုင်းပါ။ (Listen, Learn & Negotiate)
အခြားသူတွေနဲ့ပူးပေါင်းလုပ်ဆောင်တဲ့အခါ ကိုယ့်သဘောထားကိုပြောပြဖို့လိုသလို အခြားသူတွေရဲ့ သဘောထားကိုလည်း နားထောင်တတ်ဖို့လိုအပ်ပါတယ်။ အခြားသူကပေးတဲ့ အကြံပြုချက်တွေကိုလည်း အလေးအနက်ထား စဉ်းစားပေးဖို့လိုပါတယ်။ တစ်ဦးနှင့်တစ်ဦး အမြင်မတူကြတဲ့အခါမှာလည်း ညှိနှိုင်း လုပ်ဆောင်ဖို့ လိုပါတယ်။
(၄) စိန်ခေါ်မှုတွေ ပြဿနာတွေကို တစ်ယောက်ကိုတစ်ယောက်အပြစ်မတင်ဘဲ ကျော်လွှားပါ။ (Overcome the challenges without blaming others)
အခြားသူက အမှားလုပ်မိတဲ့အခါမှာ အပြစ်မတင်ဖို့လိုအပ်သလို သူဘာကြောင့် ဒီလိုလုပ်ရသလဲ ဆိုတာကိုနားလည်အောင် လုပ်ဖို့လိုပါတယ်။ ကိုယ်အမှားလုပ်မိရင်လည်း ဝန်ခံပြောပြပြီး တာဝန်ယူဖို့လိုပါတယ်။ ဒီလိုမှသာ တစ်ယောက်နဲ့တစ်ယောက်ကြား ယုံကြည်မှုတိုးလာပြီး ပြဿနာစိန်ခေါ်မှုတွေကို ကျော်လွှားဖို့ အတူတကွ လုပ်ဆောင်နိုင်မှာပါ။
(၅) သဘောပေါက်လက်ခံလွယ်သော စိတ်ဓာတ် ထားရှိပါ။ (Open-minded)
ကောင်းမွန်တဲ့ ပူးပေါင်းလုပ်ဆောင်နိုင်သူ တစ်ယောက်ဖြစ်ဖို့ဆိုရင် မတူညီတဲ့ အကြံဉာဏ်တွေကို ဝေဖန်မှုမလုပ်ဆောင်ပဲပဲ နားထောင်ပေးဖို့ လိုအပ်ပါတယ်။ အခြားသူတစ်ယောက်မှာ ကိုယ်နဲ့မတူတဲ့ လုပ်ဆောင်မှုရှိနိုင်သလို ပရောဂျက်ကို ချဉ်းကပ်ပုံချင်းလည်း မတူနိုင်ပါဘူး။ မတူညီတဲ့ အကြံဉာဏ်တွေကို ပွင့်ပွင့်လင်းလင်းဆွေးနွေးခြင်းဖြင့် ပိုမိုကောင်းမွန်တဲ့ ပူးပေါင်းလုပ်ဆောင်မှုရလဒ်တွေကို ရရှိစေပါတယ်။ ထို့ကြောင့် မတူညီသော အမြင်များ၊ အယူအဆများ၊ idea များကိုလက်ခံနားထောင်ပြီး စဉ်းစာသုံးသပ်ရန် လိုအပ်ပါတယ်။ အပြောင်းအလဲ အသစ်အဆန်းကို လက်ခံရန် ခက်ခဲခြင်းသည် ပူးပေါင်းဆောင်ရွက်တဲ့အခါမှာ အဟန့်အတားဖြစ်စေပါတယ်။
(၆) အပြန်အလှန်ယုံကြည်မှု ထားရှိခြင်း။ (Trust)
လုပ်ငန်းများကို စုပေါင်းဆောင်ရွက်ရာတွင် အဖွဲ့ဝင်များအချင်းချင်း အပြန်အလှန် ယုံကြည်မှုရှိမှသာ လုပ်ငန်းကို အောင်မြင်အောင်လုပ်ဆောင်နိုင်မှာဖြစ်ပါတယ်။ တူညီသော ဘုံရည်မှန်းချက် အောင်မြင်ဖို့ အားလုံးပူးပေါင်းဆောင်ရွက်ရတဲ့အတွက်ကြောင့် အပြန်အလှန် ယုံကြည်မှုရှိခြင်း၊ ပံ့ပိုပေးခြင်း၊ အပြုသဘောဆောင်သော အကြံပြုချက်များပေးခြင်းက အရေးပါတယ်။
(၇) ပြောင်းလွယ်ပြင်လွယ်ရှိခြင်း။ (Flexibility)
မည်သည့် လုပ်ငန်းတွင်မဆို မမျှော်လင့်ဘဲ အခက်အခဲ၊ အတားအဆီးများ၊ အပြောင်းအလဲများ ရှိနိုင်ပါတယ်။ လုပ်ငန်းများဆောင်ရွက်နေစဉ် မမျှော်လင့်သော အခက်အခဲများ၊ အပြောင်းအလဲများ ပေါ် ပေါက်လာသည့်အခါ ယခင်က ချမှတ်ထားသော အစီအစဉ်များကို အခြေအနေနှင့် လိုက်လျောညီထွေပြုပြင် ပြောင်းလဲပြီး ရည်ရွယ်ချက်အောင်မြင်အောင် ဆက်လက်ဆောင်ရွက်နိုင်ရန် အရေးကြီးပါတယ်။
(၈) အပြုသဘောဆောင်သော အကောင်းမြင်စိတ်ရှိခြင်း။ (Positivity)
အများနှင့် ပူးပေါင်းဆောင်ရွက်ရသော လုပ်ငန်းများတွင် အပြုသဘောဆောင်သောစိတ်၊ အကောင်းမြင်စိတ်သည် မရှိမဖြစ် လိုအပ်ပါတယ်။ အပြုသဘောဆောင်သော အကောင်းမြင်စိတ်ရှိခြင်း (Positivity)သည် အဖွဲ့ဝင်များကြားတွင် ယုံကြည်မှုတည်ဆောက်ခြင်း၊ ဆက်သွယ်ရေးကို ပိုမိုကောင်းမွန်စေခြင်း၊ ပွင့်လင်းမြင်သာမှုရှိစေခြင်းနှင့် လိုက်လျောညီထွေရှိခြင်းတို့ကို တိုးတက်စေရန် ကူညီပေးပါတယ်။
(၉) ရေရှည်မျှော်တွေးတတ်ခြင်း။ (Long-term thinking)
လုပ်ငန်းများတွင် အတူတူပူးပေါင်းဆောင်ရွက်ရသော စီမံကိန်းနယ်ပယ် (project scope) နှင့် ပြီးမြောက် အောင်မြင်နိုင်မည့်အချိန်၊ အဖွဲ့ဝင်များအားလုံး၏ တာဝန်ခွဲဝေဆောင်ရွက်နိုင်မှုနှင့် ပြီးမြောက် နိုင်မည့်အခြေအနေ၊ ကြုံတွေ့လာနိုင်မည့် အခက်အခဲများ စတဲ့အရာတွေကို ရေရှည်အတွက် မျှော်တွေးပြီး ကြိုတင်ပြင်ဆင်ထားရပါမယ်။
(၁၀) စနစ်တကျ ဖွဲ့စည်း စီစဉ်ထားမှုရှိခြင်း။(Organization)
လူတွေက အလုပ်တာဝန်ခွဲဝေဆောင်ရွက်တာ ကိုယ့်တာဝန်ကိုယ်ယူတာ စည်းစနစ်တကျဖြစ်အောင် ဆောင်ရွက်တာတွေကို မလုပ်နိုင်ဘူးဆိုရင် ပူးပေါင်းဆောင်ရွက်မှုက အောင်မြင်နိုင်မှာ မဟုတ်ပါဘူး။ ခေါင်းဆောင်များသည် အဖွဲ့သားများ၏ နေ့စဉ်လုပ်ငန်းဆောင်တာများတွင် တစ်စိတ်တစ်ပိုင်းအဖြစ် ပူးပေါင်းဆောင်ရွက်ခြင်းဖြင့် ပိုမိုစနစ်တကျဖြစ်စေရန် ၎င်းတို့ကို လေ့ကျင့်ပေးနိုင်ပါတယ်။ အကယ်၍ အဖွဲ့သားတွေက တာဝန်ကျေပြွန်ပြီး အချင်းချင်း ပုံမှန်ညှိနှိုင်းဆောင်ရွက်နေမယ်ဆိုရင် အလုပ်ချိန်နှင့် အလုပ်တာဝန်များကို စနစ်တကျစီမံတတ်လာစေမှာဖြစ်ပါတယ်။
လုပ်ငန်းခွင်ထဲမှာ ကိုယ်တစ်ဦးတစ်ယောက်တည်းလုပ်ဆောင်လို့မရသလို အခြားသူတွေ နဲ့ ပူးပေါင်းလုပ်ဆောင်ခြင်းဖြင့် အခြားသူတွေထံက မတူညီတဲ့ စွမ်းဆောင်ရည်များကိုလည်း လေ့လာသင်ယူ နိုင်ပါတယ်။ပူးပေါင်းပါဝင်ဆောင်ရွက်ခြင်းစွမ်းရည် (Collaboration Skills)က အဖွဲ့အစည်းအတွက် ပိုမိုကောင်းမွန်တဲ့ ရလဒ်တွေကို ရရှိစေနိုင်တဲ့အပြင် ကိုယ့် career အတွက်လည်း အထောက်အကူဖြစ်စေမှာပါ။ ဒါကြောင့် collaboration skills ကိုကောင်းမွန်စေဖို့ အထက်ပါအချက်လေးတွေကို လုပ်ဆောင်ကြည့်ပါလို့ စာဖတ်သူတို့ကို မျှဝေတိုက်တွန်းလိုက်ပါတယ်။
References
https://staff-force.com/effective-collaboration-skills/
https://blog.jostle.me/blog/6-collaboration-skills-and-how-to-foster-them