Conflict Resolution

💠ပဋိပက္ခ (Conflict) ဆိုတာဘာလဲ။

ပဋိပက္ခဆိုတာ လူနှစ်ယောက် (သို့မဟုတ်) နှစ်ယောက်ထက်ပိုပြီး လူများအကြား မတူညီတဲ့ အမြင်နဲ့ တန်ဖိုးထားမှုတွေ ရှိတဲ့အခါ ဖြစ်ပေါ်နိုင်ပါတယ်။ ပဋိပက္ခက သင်နဲ့ သင့်သူငယ်ချင်းများ၊ မိဘများ၊ အတန်းဖော်များနဲ့ လုပ်ဖော်ကိုင်ဖက်များအကြား ဖြစ်ပေါ်နိုင်ပါတယ်။ သင်ကိုယ်တိုင် အတွင်းစိတ်ထဲကလည်း ပဋိပက္ခဖြစ်ပေါ်နိုင်ပါတယ်။ တစ်ခါတစ်ရံသင့်သူငယ်ချင်းတစ်ဦး (သို့မဟုတ်) မိသားစုဝင်တစ်ဦးကို ထောက်ခံပေးခြင်းကြောင့် သင်ကိုယ်တိုင် ပဋိပက္ခအခြေအနေအတွင်း ဝင်ရောက်သွားနိုင်ပါတယ်။

ပဋိပက္ခအမျိုးအစားများမှာ_ 

• လူတစ်ဦး၏စိတ်အတွင်း—တစ်ဦးတစ်ယောက်အတွေးထဲတွင်ဖြစ်ပေါ်ခြင်း၊ 
• လူတစ်ဦးနှင့်တစ်ဦးကြား—လူလူချင်းကြားဖြစ်ပေါ်ခြင်း၊ 
• အဖွဲ့အတွင်း — အဖွဲ့တစ်ဖွဲ့အတွင်းဖြစ်ပေါ်ခြင်း၊ 
• အဖွဲ့များကြား — အဖွဲ့တစ်ခုနှင့်တစ်ခု ကြားဖြစ်ပေါ်ခြင်း  တို့ဖြစ်ပါတယ်။

💠ပဋိပက္ခ ဖြစ်ပွားရခြင်း အကြောင်းရင်း (၅) ချက်

၁။ သတင်းအချက်အလက် မှန်ကန်လုံလောက်စွာ မရရှိမှုနဲ့ ဆက်သွယ်ပြောဆိုမှု အားနည်းခြင်း

ပဋိပက္ခ ဖြစ်ပွားရတဲ့ အကြောင်းအရင်းတွေထဲက တစ်ခုကတော့ သတင်းအချက်အလက် မှန်ကန်လုံလောက်စွာ မရရှိမှုနဲ့ ဆက်သွယ်ပြောဆိုမှု အားနည်းခြင်းကြောင့် ဖြစ်ပါတယ်။ လူမှုအသိုင်းအဝိုင်းနှစ်ခုကြားဖြစ်စေ၊ လုပ်ငန်းခွင်တွင်ဖြစ်စေ၊ မိသားစုအချင်းချင်း၊ မောင်နှမအချင်းချင်း၊ သူငယ်ချင်း အချင်းချင်းကြားတွင်ဖြစ်စေ ကွဲလွဲသော သတင်းအချက်အလက်များကို ရရှိထားတဲ့အခါ မတူညီသော အမြင်များ ရှိလာတတ်ကြပြီး နားလည်မှု လွဲမှားခြင်းများ ဖြစ်ပေါ်နိုင်ပါတယ်။ ဒီလို နားလည်မှု လွဲမှားကြတဲ့အခါ များသောအားဖြင့် တစ်ဦးနဲ့တစ်ဦး အဆက်အသွယ် ဖြတ်တောက်ပစ်တတ်ကြတဲ့အတွက်ကြောင့် ပြဿနာဖြေရှင်းဖို့ အခွင့်အလမ်းတွေ နည်းပါးသွားပြီး ပဋိပက္ခတွေ ပိုမိုများပြားလာနိုင်ပါတယ်။

၂။ အကျိုးစီးပွားအတွက် ပြိုင်ဆိုင်ကြမှု

ဒုတိယအချက်ကတော့ အကျိုးစီးပွားအတွက် ပြိုင်ဆိုင်ကြမှုတွေ ဖြစ်ပါတယ်။ တန်ဖိုးကြီးတဲ့ ရင်းမြစ်များ၊ ပိုက်ဆံနဲ့ စီးပွားရေးအခွင့်အလမ်း၊ လုပ်ငန်းခွင်အတွင်း နေရာရရှိမှုများကဲ့သို့သော အကျိုးစီးပွားအတွက် လူနှစ်ဦးအကြား၊ အသင်းနှစ်သင်းအကြား၊ လူမှုအသိုင်းအဝိုင်းနှစ်ခုအကြား အပြင်းအထန် ပြိုင်ဆိုင်ကြသောအခါတွင်လည်း ပဋိပက္ခများ ဖြစ်ပွားတတ်ကြောင်း သတိပြုမိဖို့ လိုအပ်ပါတယ်။ ဒီလို ပဋိပက္ခတွေ ဖြစ်ပွားတဲ့အခါမှာ တစ်ဘက်နှင့် တစ်ဘက် ညှိုနှိုင်းအဖြေရှာပြီး အလျှော့အတင်းများ ပြုလုပ်ပြီး ဖြေရှင်းလို့ရပါတယ်။ ထို့နည်းတူပဲ ပြဿနာအရင်းခံနဲ့ ပတ်သက်ပြီး ပိုမိုအလေးပေး ဆန်းစစ်ကာ တစ်ဘက်လူ၊ တစ်ဖက်အဖွဲ့ရဲ့ အဓိက လိုအပ်ချက်က ဘာလဲဆိုတာကို သေချာလေ့လာပြီး ပဋိပက္ခတွေကို ဖြေရှင်းလို့ ရနိုင်ပါတယ်။ 

၃။ မတူညီတဲ့ ဦးစားပေးမှု

ပဋိပက္ခဖြစ်ပွားရခြင်း အကြောင်းရင်းတွေထဲက တတိယတစ်ချက်ကတော့ လူတစ်ဦးစီ၊ အဖွဲ့တစ်ခုစီမှာရှိကြတဲ့ မတူညီတဲ့ ဦးစားပေးမှုတွေကြောင့်ပဲ ဖြစ်ပါတယ်။ လူတွေမှာ ကိုယ်တန်ဖိုးထားရတဲ့ အကြောင်းကိစ္စတွေ၊ ကိုယ်ဦးစားပေးရမယ့် အရာတွေနဲ့ ပတ်သက်လာတဲ့အခါ မတူညီတဲ့ စံနှုန်းတွေ ရှိတတ်ကြပါတယ်။ တစ်ဖက်လူ ဒါမှမဟုတ် တစ်ဖက်အဖွဲ့အစည်းက တန်ဖိုးထားရတဲ့ အရာနဲ့ မိမိတို့ဘက်က တန်ဖိုးထားရတဲ့ အရာတွေ မတူညီကြတဲ့အခါ ကိုယ့်အမြင်ကမှ မှန်ကန်တယ်၊ ကိုယ့်အဖွဲ့ရဲ့ လုပ်ရပ်တွေကမှ အရေးပါတယ်ဆိုပြီး တစ်ဘက်လူနဲ့ တစ်ဖက်အဖွဲ့အစည်းရဲ့ အတွေးအမြင်တွေကို အထင်သေးမိတာမျိုးတွေ ရှိတတ်ပါတယ်။ နှစ်ဦးနှစ်ဘက်ကြား ဘုံနားလည်သဘောတူမှုတွေ၊ ဘယ်အရာဟာ အရေးကြီးဆုံးလဲဆိုတဲ့ နှစ်ဦးနှစ်ဘက် အလုပ်ဖြစ်မယ့် အတွေးအခေါ်မျိုးတွေ မရှိရင်တော့ ပဋိပက္ခတွေ ဆက်လက်ဖြစ်ပွားနေဦးမှာပါပဲ။

၄။ ပြင်းထန်တဲ့ စိတ်ခံစားချက်များ

ပဋိပက္ခဖြစ်ပွားရခြင်း အကြောင်းရင်းတွေထဲက စတုတ္ထတစ်ချက်ကတော့ ပြင်းထန်တဲ့ စိတ်ခံစားချက်တွေပဲ ဖြစ်ပါတယ်။ အရေးကြီးတဲ့ အခြေအနေတွေမှာ အန္တရာယ်ကျရောက်နိုင်မှုနဲ့ အခွင့်အလမ်းရရှိနိုင်မှုတို့အကြားမှာ ပြင်းထန်တဲ့ စိတ်ခံစားချက်တွေ ဖြစ်ပေါ်လာတတ်ပြီး ဒီစိတ်ခံစားချက်တွေအလိုက် စကားလုံးအားဖြင့်၊ ကိုယ်ကာယအားဖြင့်၊ အမူအရာအားဖြင့် ပြင်းထန်တဲ့ တုန့်ပြန်မှုတွေ ဖြစ်ပေါ်လာလေ့ရှိပါတယ်။ ယခင်က ကြုံခဲ့ရဖူးတဲ့ စိတ်ဒဏ်ရာဟောင်းတွေ၊ ဆိုးရွားတဲ့ အတွေ့အကြုံတွေကြောင့် ဒီလိုခံစားချက်တွေဟာ ပိုမိုပြင်းထန်လာလေ့ရှိပြီး အကျိုးသင့်အကြောင်းသင့် မစဉ်းစားနိုင်တော့ဘဲ စိတ်လွတ်လက်လွတ် ပြုမူပြောဆိုမိတဲ့အခါ ပဋိပက္ခတွေဟာ ပိုမို ပြင်းထန်လာရလေ့ရှိပါတယ်။

၅။ သာတူညီမျှမှု၊ တန်းတူညီမျှမှု မရှိတဲ့ ထိန်းချုပ်ခံရမှု

ပဋိပက္ခဖြစ်ပွားရခြင်း အကြောင်းရင်းတွေထဲက နောက်ဆုံးတစ်ချက်ကတော့ သာတူညီမျှမှု၊ တန်းတူညီမျှမှု မရှိဘဲ ထိန်းချုပ်ခံရမှုတွေကြောင့်ပဲ ဖြစ်ပါတယ်။ ဒါဟာ ပဋိပက္ခတော်တော်များများ ဖြစ်ပေါ်ရတဲ့ အကြောင်းအရင်းတွေထဲက တစ်ခုလည်း ဖြစ်ပါတယ်။ ရပိုင်ခွင့်တစ်ခုအတွက် ပြိုင်ဆိုင်ကြတဲ့အခါ၊ ကိုယ်မှန်တယ်လို့ထင်တဲ့ အရာတစ်ခုအတွက် ဒါမှမဟုတ် တရားမျှတမှုတစ်ခုရရှိဖို့အတွက်  ပြိုင်ဆိုင်ကြတဲ့ခါ ပဋိပက္ခတွေ ဖြစ်ပွားလေ့ရှိပါတယ်။ ဒါကြောင့်မို့ ပဋိပက္ခတွေအကြောင်းပြောကြတဲ့အခါ တရားမျှတမှု၊ သာတူညီမျှမှုနဲ့ တန်းတူညီမျှမှုတို့လိုမျိုး အကြောင်းအရာတွေကို ဆက်စပ်သုံးနှုန်းကြတာတွေကိုလည်း တွေ့မြင်ရလေ့ရှိပါတယ်။

💠Thomas-Kilmann ရဲ့ ပဋိပက္ခကို ကိုင်တွယ်ပုံ (၅)မျိုး

Thomas-Kilmann ရဲ့ ပဋိပက္ခကို ကိုင်တွယ်ပုံ (၅)မျိုးကတော့ အောက်ပါအတိုင်းပဲ ဖြစ်ပါတယ်။  

 ၁။ မိမိအလိုလိုက်ရန်တိုက်တွန်းခြင်း(Competing)

၂။ ရှောင်ဖယ်ခြင်း(Avoiding)

၃။ လိုက်လျောခြင်း(Accommodating)

၄။ နှစ်ဖက်အလျှော့ပေးခြင်း(Compromising)

၅။ ပူးပေါင်းဖြေရှင်းခြင်း(Collaborating)

ဒီပုံစံ (၅) မျိုးအကြောင်းနဲ့ တစ်မျိုးစီကို ဘယ်လိုအခြေအနေတွေမှာ အသုံးပြုကြသလဲဆိုတာကို အောက်မှာ အသေးစိတ် ဆက်လက်ဖတ်ရှုကြည့်နိုင်ပါတယ်။

 ၁။ မိမိအလိုလိုက်ရန်တိုက်တွန်းခြင်း(Competing)

မိမိအလိုလိုက်ရန်တိုက်တွန်းခြင်းဆိုတာကတော့ ကိုယ့်ရဲ့ ကိုယ်ပိုင်လိုအပ်ချက်တွေကိုပဲ ရှေ့တန်းတင်ပြီး တစ်ဘက်သားကို လျစ်လျူရှုလိုက်တာမျိုးဖြစ်ပါတယ်။ ဒီလိုပဋိပက္ခ ကိုင်တွယ်ပုံကိုတော့ ကိုယ့်ရဲ့ ကိုယ်ပိုင်အခွင့်အရေးအတွက်၊ ကိုယ်မှန်တယ်လို့ထင်တဲ့ အရာတစ်ခုအတွက် ရပ်တည်ချက်တစ်ခုကို ပြုလုပ်ရတဲ့အခါမျိုးမှာ အတွေ့ရများလေ့ရှိပါတယ်။ အရေးပေါ်အခြေအနေတွေလိုမျိုး လျင်လျင်မြန်မြန် ဆုံးဖြတ်ချက် ချရတဲ့အခါမျိုးတွေမှာ၊ ဒါမှမဟုတ် အများက မကြိုက်ကြတဲ့ ကိစ္စရပ်မျိုးတွေ (ဥပမာ – ကုမ္ပဏီတစ်ခုမှာ ငွေကြေးမလုံလောက်တော့တဲ့အခါ အသုံးစားရိတ်ကို လျှော့ချဖို့အတွက် ဝန်ထမ်းအချို့ကို အလုပ်ထုတ်ရခြင်း) ကို မဖြစ်မနေ ဆောင်ရွက်ကြရတဲ့အခါမျိုးတွေမှာ ဒီနည်းလမ်းကို သုံးလေ့ရှိကြပါတယ်။

၂။ ရှောင်ဖယ်ခြင်း(Avoiding)

ရှောင်ဖယ်ခြင်းဆိုတာကတော့ ပဋိပက္ခကို လုံးဝ လျစ်လျူရှုလိုက်ခြင်း၊ ဒါမှမဟုတ် ပဋိပက္ခဖြေရှင်းဖို့ကို အချိန်ဆွဲလိုက်ခြင်းမျိုး ဖြစ်ပါတယ်။ ပြဿနာတစ်ခုကို သိပ်အရေးကြီးတယ်လို့ မယူဆကြတဲ့အခါ၊ ဖြေရှင်းလည်း ကိုယ်အနိုင်ရဖို့ မရှိဘူးလို့ ထင်တဲ့အခါ၊ ဖြေရှင်းလိုက်လို့ ရလာမယ့် အကျိုးအမြတ်ထက် ကိုယ့်ကို ပြန်ပြီး ထိခိုက်လာနိုင်မယ့် နောက်ဆက်တွဲတွေက ပိုမို ကြီးမားနေတဲ့အခါမျိုးမှာ “ရှောင်ဖယ်ခြင်း” နည်းလမ်းကို သုံးလေ့ရှိပါတယ်။ များသောအားဖြင့်တော့ အထက်မှာ ဖော်ပြခဲ့တဲ့ “မိမိအလိုလိုက်ရန်တိုက်တွန်းခြင်း” ဆိုတဲ့ နည်းလမ်းကို အသုံးပြုချင်ပေမဲ့ မိမိကိုယ်ကို ယုံကြည်မှုမရှိတဲ့အခါမှာ “ရှောင်ဖယ်ခြင်း” နည်းလမ်းကို အလိုအလျောက် အသုံးပြုလေ့ ရှိကြပါတယ်။

၃။ လိုက်လျောခြင်း(Accommodating)

လိုက်လျောခြင်းဆိုတဲ့ နည်းလမ်းကတော့ ကိုယ့်ရဲ့ လိုအပ်ချက်တွေကို လက်လျှော့လိုက်ပြီး တစ်ဘက်သားရဲ့ အလိုဆန္ဒတွေကို ဖြည့်ဆည်းပေးလိုက်ခြင်းဖြစ်ပြီး အနစ်နာခံလိုက်တဲ့ သဘောမျိုး သက်ရောက်ပါတယ်။ အနိုင်ရဖို့ထက် သဟဇာတဖြစ်ဖို့နဲ့ ပြဿနာတွေကို ရှောင်ရှားဖို့အတွက် ဒီနည်းလမ်းကို အသုံးပြုကြပါတယ်။ ဒါမှမဟုတ် အခြားတစ်ဘက်က အနိုင်ရသင့်တယ်လို့ ကိုယ်က သဘောပေါက် နားလည်သွားတဲ့အခါမှာလည်း “လိုက်လျောခြင်း” ဆိုတဲ့ နည်းလမ်းကို အသုံးပြုပြီး ပဋိပက္ခကို ဖြေရှင်းလေ့ရှိကြပါတယ်။

 ၄။ နှစ်ဖက်အလျှော့ပေးခြင်း(Compromising)

နှစ်ဖက်အလျှော့ပေးခြင်းဆိုတာကတော့ ဒီနည်းလမ်း (၅) ခုလုံးထဲမှာမှ အစွန်းမရောက်ဘဲ အလယ်အလတ်အကျဆုံးဖြစ်တဲ့ နည်းလမ်းလို့ ပြောလို့ရပါတယ်။ တစ်ဘက်နဲ့ တစ်ဘက် ညှိုနှိုင်းကြပြီး နှစ်ဘက်လုံး လက်ခံနိုင်မယ့်၊ ကျေနပ်နိုင်မယ့် အဖြေတစ်ခုကို ရှာတာပဲဖြစ်ပါတယ်။ လိုအပ်ချက်ပန်းတိုင်တွေဟာ အတော်အတန် အရေးပါပြီး၊ အခြားသော နည်းလမ်းတွေကို သုံးတာထက် နှစ်ဖက်အလျှော့ပေးလိုက်တာက အထိအခိုက် နည်းနိုင်မယ်လို့ ယူဆတဲ့အခါ ဒီနည်းလမ်းကို သုံးကြပါတယ်။ လျင်လျင်မြန်မြန်လည်း ဖြေရှင်းလို့ပြီး အလယ်အလတ်လမ်းစဉ်လည်း ဖြစ်တဲ့အခါမှာ ပြီးပြည့်စုံနေတာမျိုး မဟုတ်သည့်တိုင် နှစ်ဦးနှစ်ဘက် လက်ခံနိုင်မယ့်၊ အတော်အတန် တရားမျှတပါတယ်လို့ ခံစားရစေတဲ့ အဖြေကို ရရှိနိုင်မယ့် ပဋိပက္ခ ဖြေရှင်းနည်းဖြစ်ပါတယ်။

 ၅။ ပူးပေါင်းဖြေရှင်းခြင်း(Collaborating)

ပူးပေါင်းဖြေရှင်းခြင်းဆိုတာကတော့ နှစ်ဦးနှစ်ဘက်လုံးရဲ့ လိုလားမှုတွေကို ဖြည့်ဆည်းနိုင်ဖို့ နှစ်ဘက်ပူးပေါင်းဆောင်ရွက်တာ ဖြစ်ပါတယ်။ ပြဿနာကို အတွင်းကျကျ လေ့လာကြပြီး နှစ်ဦးနှစ်ဘက်လုံးမှာရှိတဲ့ စိုးရိမ်မှုတွေကို ဖြေရှင်းနိုင်မယ့် အခြားနည်းလမ်း (alternative) တစ်ခုကို ရှာကြတာပဲ ဖြစ်ပါတယ်။ ဒီနည်းလမ်းဟာ ပြဿနာဖြေရှင်းခြင်း နည်းလမ်းသစ်တွေကို ဖော်ဆောင်ပေးနိုင်ပြီး အမြင်အမျိုးမျိုးကို ထည့်သွင်းစဉ်းစားတတ်တဲ့ အလေ့အကျင့်ကောင်းတွေကို တိုးပွားစေနိုင်ပါတယ်။ ဒါ့အပြင် ပူးပေါင်းဖြေရှင်းခြင်းနည်းလမ်းကနေ ထွက်ပေါ်လာတဲ့ ရလဒ်တွေဟာ ရေရှည်ခံလေ့ ရှိပါတယ်။

💠Conflict Resolution ဆိုတာ ဘာလဲ။

ပဋိပက္ခဖြေရှင်းခြင်းဆိုတာ ပြဿနာတစ်ခု ဒါမှမဟုတ် အငြင်းပွားမှုတစ်ခုအတွက် ဖြေရှင်းချက်တစ်ခုရရှိလာအောင် လူနှစ်ဦး (သို့မဟုတ်) အဖွဲ့နှစ်ဖွဲ့ (သို့မဟုတ်) ထို့ထက်ပိုတဲ့ အဖွဲ့များ လုပ်ဆောင်တဲ့ လုပ်ငန်းစဉ်ဖြစ်ပါတယ်။ ပါဝင်ပတ်သက်သူတွေက ပြဿနာကို အကျိုးရှိရှိဖြေရှင်းနိုင်တဲ့ အဖြေတစ်ခုရရှိဖို့ အတူတကွပူးပေါင်းဆောင်ရွက်ကြပါတယ်။

ပဋိပက္ခစီမံခန့်ခွဲမှု ကျွမ်းကျင်သူတွေက ပဋိပက္ခများကို စီမံခန့်ခွဲမှုပုံစံအမျိုးမျိုး အသုံးပြုပြီး ချဉ်းကပ်နိုင်ပါတယ်။ ဒီပုံစံတွေက ကွဲပြားနိုင်ပေမယ့် ဖြေရှင်းတဲ့နည်းလမ်းတိုင်းက တူညီတဲ့ စီမံခန့်ခွဲမှုစွမ်းရည်ကိုသာ အသုံးပြုရပါတယ်။ ပဋိပက္ခကို အောင်မြင်စွာ စီမံခန့်ခွဲနိုင်ဖို့ သင်က လိုအပ်တဲ့ ကျွမ်းကျင်မှုတွေကို စဉ်ဆက်မပြတ် လေ့လာသင်ယူပြီး ပဋိပက္ခတွေကို ကိုင်တွယ်ဖြေရှင်းဖို့လည်း ကြိုးစားသင့်ပါတယ်။ လုပ်ငန်းခွင်ပဋိပက္ခတွေကို ထိထိရောက်ရောက် စီမံခန့်ခွဲလိုပါက လိုက်နာကျင့်သုံးဖို့ လိုအပ်တဲ့ အဓိကအရည်အချင်းတွေနဲ့ လက္ခဏာအချို့ကို အောက်တွင် ဖော်ပြထားပါတယ်။

💠လုပ်ငန်းခွင်ပဋိပက္ခတွေ စီမံခန့်ခွဲရာမှာ လိုက်နာကျင့်သုံးဖို့ လိုအပ်တဲ့ အဓိက အရည်အချင်းတွေနဲ့ လက္ခဏာများ

1. Active listening (ဂရုတစိုက်နားထောင်ခြင်း။)

ဂရုတစိုက်နားထောင်ခြင်း (Active listening)က တစ်ဖက်လူပြောတဲ့စကားကို တလေးတစား နားထောင်ပေးခြင်းဖြစ်ပါတယ်။ ဒီကျွမ်းကျင်မှုကို ဆရာတွေက ကျောင်းသားတွေနဲ့ ဆက်ဆံပြောဆိုတဲ့အခါ ပိုမိုကောင်းမွန်စွာ သင်ကြားနိုင်ဖို့အတွက် အသုံးပြုကြပါတယ်။ ကျွမ်းကျင်ပညာရှင်တိုင်း ရှိသင့်တဲ့ universal အရည်အချင်းတစ်ခုလည်းဖြစ်သည်။

ဂရုတစိုက်နားထောင်ခြင်းကို ကောင်းမွန်လာအောင် လေ့ကျင့်ဖို့ သင်လုပ်ဆောင်နိုင်တဲ့ အရေးကြီးဆုံးအရာတွေက ပွင့်လင်းသောစိတ်ရှိဖို့ နဲ့ အခြေအနေကို နားစွင့်ထားဖို့ပဲ ဖြစ်ပါတယ်။ ဒါတွေကို ပြုလုပ်ဖို့၊ အခြားသူတစ်ဦးရဲ့ စကားအသုံးအနှုန်းကို မှတ်သားထားပြီး အလားတူ အသုံးအနှုန်းကို အသုံးပြုခြင်းဖြင့် တုံ့ပြန်ပြောဆိုပါ။ သင်နားထောင်နေကြောင်း သက်သေပြပြီး ဆွေးနွေးနေတဲ့အချက်တွေနဲ့ ပတ်သက်ပြီး ရှုပ်ထွေးမှုတွေကို ရှင်းလင်းစေပါတယ်။ ဒါ့အပြင် မေးခွန်းတွေမေးပြီး တစ်ဖက်လူရဲ့ ဆန္ဒသဘောထားကို နားလည်ဖို့ အာရုံစိုက်ပါ။

2. Emotional Intelligence (စိတ်ခံစားမှုဆိုင်ရာ ဉာဏ်ရည်ဉာဏ်သွေး)

ဥာဏ်ရည်ဥာဏ်သွေးက အခြားသူတွေရဲ့ စိတ်ခံစားချက်များကိုသာမက သင့်ကိုယ်တိုင်ကိုပါ သိရှိနားလည်နိုင်စွမ်းကို ဖော်ပြပါတယ်။။ ပဋိပက္ခတွေရဲ့ အခြေအနေကို တိုးမလာအောင် တားဆီးထာတာကြောင့် စီမံခန့်ခွဲရာမှာ ဒီကျွမ်းကျင်မှုက မရှိမဖြစ်လိုအပ်ပါတယ်။ အတိုက်အခံတွေရဲ့ စိတ်ခံစားချက်တွေကို ထိထိရောက်ရောက် အဓိပ္ပာယ်ဖွင့်ဆိုနိုင်လျှင် သူတို့နဲ့ ဆက်သွယ်ဖို့ ပိုမိုလွယ်ကူပါလိမ့်မယ်။ ပဋိပက္ခတွေကို ညှိနှိုင်းဖြေရှင်းရာမှာ နှစ်ဦးနှစ်ဖက်မှာ ဖြစ်ပေါ်လာနိုင်တဲ့ ရှုပ်ထွေးမှုများ၊ ဒေါသနှင့် စိတ်ပျက်မှုများကိုလျှော့ချပေးနိုင်ဖို့ နဲ့ နားလည်ပေးနိုင်ဖို့ အရေးကြီးပါတယ်။

3. Patience (စိတ်ရှည်သည်းခံခြင်း။)

ပဋိပက္ခတွေကို ကျော်လွှားဖို့ မလွယ်ကူပါဘူး။ ပဋိပက္ခဖြေရှင်းရာမှာ လူတွေက အမှားကို မကြိုက်ကြခြင်း၊ ပြဿနာကို မကြာခဏ ဆုပ်ကိုင်ထားရခြင်းကြောင့် ပဋိပက္ခတွေကို ဖြေရှင်းရတာ ခက်ခဲပါတယ်။ ဒီအခြေအနေမျိုးမှာ ပဋိပက္ခကို ဖြေရှင်းဖို့ ကြိုးစားရင် စိတ်ရှည်ဖို့ လိုအပ်ပါတယ်။

ပြဿနာရင်းမြစ်ကို ရှုထောင့်ပေါင်စုံကစဉ်းစားဖို့ လိုအပ်ပြီး စနစ်တကျစီစဉ် ဖြေရှင်းနိုင်အောင် အချိန်အတိုင်းအတာတစ်ခု လိုအပ်ပါတယ်။ အကောင်းဆုံးကတော့ ပါဝင်သူတိုင်းရဲ့ အမြင်များ၊ အယူအဆများကို နားထောင်ပြီး ငြင်းခုံမှုတစ်ခုစီကို အညီအမျှတန်ဖိုးထားဖို့ အချိန်လိုအပ်ပါလိမ့်မယ်။ ရွေးချယ်စရာအားလုံးကို အညီအမျှစဉ်းစားပြီး အချိန်ယူခြင်းက ခေါင်းကိုက်ခြင်းကို သက်သာစေမယ့် ရေရှည်ဖြေရှင်းချက်တစ်ခု ဖြစ်ပါတယ်။

4. သမာသမတ်ကျခြင်း။

ပဋိပက္ခတွေကို ဖြေရှင်းဖို့ ခက်ခဲတဲ့ အခြားအကြောင်းရင်းတစ်ခုက ပဋိပက္ခကို အမြဲတမ်း အာရုံစိုက် မနေခြင်းကြောင့်ဖြစ်ပါတယ်။ ပဋိပက္ခက အချိန်နဲ့အမျှ ဖြစ်ပေါ်လာတတ်ပြီး တစ်ခါတစ်ရံ ပါဝင်ပတ်သက်သူတွေကြားမှာ အရင်က မကျေနပ်ချက်တွေကို ထုတ်ဖော်ပြောဆိုဖို့ အခွင့်အလမ်း တစ်ခုအဖြစ် စွမ်းဆောင်နိုင်ပါတယ်။ အစောပိုင်း ပြဿနာတွေကို မဖြေရှင်းဘဲ လက်ရှိ ပြဿနာများကို ဖြေရှင်းဖို့ မဖြစ်နိုင်ပါ။ ဒီအခြေအနေမျိုးမှာ ပုဂ္ဂိုလ်ရေးခံစားချက်နဲ့ ပဋိပက္ခကို ခွဲခြားထားခြင်းက အကောင်းဆုံးဖြစ်ပါတယ်။ လူအများနဲ့ သူတို့ရဲ့ ကိုယ်ရည်ကိုယ်သွေးတွေကို အာရုံစိုက်မနေပါနဲ့။ အဲ့ဒီအစား ပြဿနာဇစ်မြစ်ကို မြင်အောင် ကြည့်ပြီး အဖြေရှာဖို့သာ အာရုံစိုက်ပါ။

5. အပြုသဘောဆောင်ခြင်း။ 

ပဋိပက္ခတွေကို ဖြေရှင်းဖို့ ပုဂ္ဂိုလ်ရေးခံစားချက်တွေနဲ့ရောထွေးပြီး ဘယ်သူမှ အဆင်မပြေဘူးဆိုရင် တိကျတဲ့ အဖြေတစ်ခုရဖို့ ခက်ခဲပါတယ်။ ကောင်းမွန်ပြီး အပြုသဘောဆောင်တဲ့ သဘောထားမရှိဘဲ ပဋိပက္ခများကို ဖြေရှင်းဖို့ ညှိနှိုင်း ကြိုးစားခြင်းက အကျိုးမရှိနိုင်ပါ။ ပဋိပက္ခတွေက အတားအဆီးအခက်အခဲများနဲ့ ပြည့်နှက်နေပြီး ပြေလည်အောင်ဖြေရှင်းလိုပါက ပြဿနာတွေကို ကျော်လွှားလိုစိတ်ရှိဖို့ လိုအပ်ပါသည်။ ပဋိပက္ခမှာ အပြုသဘောဆောင်တဲ့ သဘောထားရှိခြင်းက အပြန်အလှန်ညှိနှိုင်းမှုကို ပိုမိုကောင်းမွန်စေပြီး အခြားပါဝင်သူ များကို ပိုမိုသက်တောင့်သက်သာဖြစ်စေတယ်။

6. ပွင့်လင်းသော ဆက်သွယ်ဆောင်ရွက်မှုရှိခြင်း

လူမှုဆက်ဆံရေးမှာ ပဋိပက္ခဖြစ်ပွားခဲ့ရင် ပါဝင်သူတွေရဲ့ ဆက်ဆံရေးက ပုံမှန်ပြန်ဖြစ်ဖို့ ခက်ခဲတတ်ပါတယ်။ ဒါကြောင့် အနာဂတ်မှာ အလားတူပြဿနာတွေ မဖြစ်ပွားဖို့ မြန်မြန်ဆန်ဆန် အဖြေရှာပြီး ကောင်းမွန်တဲ့ ဆက်ဆံရေးကို ဆက်လက်ထိန်းသိမ်းထားဖို့ လိုအပ်ပါတယ်။

အဖွဲ့အစည်းတွေကြား ပွင့်လင်းတဲ့ ဆက်သွယ်ရေးလမ်းကြောင်းကို ဖန်တီးခြင်းက ကျန်းမာတဲ့ ရေရှည်ဆက်ဆံရေးကို မွေးမြူဖို့အတွက် အကောင်းဆုံးနည်းလမ်းဖြစ်ပါတယ်။ ဒါက နှစ်ဖက်စလုံးကို အပြန်အလှန် စစ်ဆေးနိုင်စေပြီး သဘောတူညီချက်များ၊ အဆုံးအဖြတ်များကို နှစ်ဖက်စလုံးက လိုက်နာဆောင်ရွက်မှုရှိဖို့ သေချာစေပါတယ်။ စိန်ခေါ်မှုအသစ်တွေ ပေါ်ပေါက်လာပါက၊ ပွင့်လင်းတဲ့ ဆက်သွယ်ရေး စံနမူနာတစ်ခုမှာ ပါဝင်သူများသည် လုပ်ဆောင်ခဲ့တဲ့ တိုးတက်မှုကို အန္တရာယ်မဖြစ်စေဘဲ အတားအဆီးအခက်အခဲများကို ဖြေရှင်းရန်ပိုမိုလွယ်ကူစေပါတယ်။

အထက်ပါအရည်အချင်းများကို နားလည်ခြင်း၊ လိုက်နာကျင့်သုံးခြင်းက ပဋိပက္ခတွေကို ကောင်းစွာ စီမံခန့်ခွဲနိူင်ပြီး ပဋိပက္ခများ ကြီးထွားလာခြင်းရဲ့ နောက်ဆက်တွဲ ဆိုးကျိုးတွေကို ကာကွယ်နိုင်ပါတယ်။

Video Link –  https://www.youtube.com/watch?v=PHJ8eybXJdw