🗣️ ပြောဆိုဆက်သွယ်ခြင်း စွမ်းရည် (Communication Skill) ဆိုတာ ဘာလဲ။
ပြောဆိုဆက်သွယ်ခြင်းစွမ်းရည်က မိမိပြောဆိုလိုတဲ့ အကြောင်းအရာအချက်အလက်တွေကို ထိထိ ရောက်ရောက်ပြောဆိုနိုင်တဲ့ စွမ်းရည် တစ်ခု ဖြစ်ပါတယ်။ ပြောဆိုဆက်သွယ်တဲ့အခါ အဓိကပါဝင်ရမယ့်အရာ တွေက နားထောင်ခြင်း၊ ပြောဆိုခြင်း၊ အကဲခတ်ခြင်း နဲ့ စာနာမှု စွမ်းရည်တွေ ဖြစ်ပါတယ်။
📩မိမိရဲ့ communication ပုံစံက ဘယ်လိုဖြစ်နေလဲဆိုတာ ရွေးချယ်ကြည့်ပါ?
မတုန်မလှုပ်၊ မလှုပ်မယှက်ပုံစံ (Passive) – ဒီပုံစံရှိနေတဲ့သူတွေက မိမိအကြောင်းအရာတစ်ခုခုကို ပြောလိုက် ရင် အခြားသူတွေ မိမိကို စိတ်ဆိုးသွားမှာ၊ အထင်လွဲသွားမှာ၊ အပေါင်းအသင်း မလုပ်တော့မှာ စိုးတဲ့အတွက် မိမိရဲ့ ခံစားချက်တွေ၊ အမြင်တွေကို မပြောဘဲ မတုန်မလှုပ်၊ မလှုပ်မယှက်ပဲ ငြိမ်နေတဲ့ပုံစံဖြစ်ပါတယ်။
ရန်လိုတဲ့ပုံစံ (Aggressive) – ဒီပုံစံရှိနေတဲ့သူတွေက မိမိရဲ့အတွေးအခေါ်၊ အပြုအမူတွေကို အခြားသူတွေ လက်မခံတဲ့အခါ၊ ဝေဖန်တဲ့အခါ ဒေါသနဲ့ အော်ပြီးပြန်ပြောတဲ့ပုံစံဖြစ်ပါတယ်။
ထေ့ငေါ့တဲ့ပုံစံ (Passive-Aggressive) – ဒီပုံစံရှိတဲ့သူတွေကတော့ အခြားသူတွေရဲ့ အပြုအမူတွေက မိမိအတွက်နာကျင်ရတဲ့အခါ သို့မဟုတ် မိမိခံစားချက်တွေကို ပြောမပြနိုင်တဲ့အခါ မှန်ကန်ရာကို မပြောဘဲ ထစ်ငေါ့ပြီး အရွဲ့တိုက်ကြသလို silent treatment လို့ခေါ်တဲ့ မိမိခံစားချက်တွေကို မပြောပြဘဲ မိမိ စိတ်သက် တောင့်သက်သာမဖြစ်တဲ့ပုံ၊ စိတ်မကျေနပ်တဲ့ပုံစံနဲ့ နေထိုင်ခြင်းပုံစံတွေကို ပြသကြပါတယ်။
ယုံကြည်မှုဖြင့်အခိုင်အမာပြောဆိုခြင်း (Assertive) – ဒီပုံစံကတော့ အကောင်းဆုံးပြောဆိုဆက်သွယ်တဲ့ ပုံစံပဲဖြစ်ပါတယ်။ မိမိပြောဆိုချင်တာကို ရိုးသားစွာပြောပြီး မိမိမလုပ်ချင်တဲ့အရာတွေအတွက်လည်း ကျိုးကြောင်းနဲ့ မိမိမလုပ်နိုင်ကြောင်း ငြင်းဆိုတဲ့ပုံစံဖြစ်ပါတယ်။ သို့သော် အခြားသူတွေရဲ့ ခံစားချက်တွေ၊ အကြံဉာဏ်တွေကိုလည်း တလေးတစားနားထောင်တတ်တဲ့ပုံစံမျိုးလည်းဖြစ်တယ်။
ဒီပုံစံ (၄) ခုကို ဥပမာတစ်ခုနဲ့ ဘယ်လိုပြောဆိုဆက်သွယ်တုံ့ပြန်ပုံခြင်းကွာခြားသွားသလဲဆိုတာ ကြည့်ကြရအောင်။
💠Important Facts in Communication (ပြောဆိုဆက်ဆံခြင်းရဲ့ အရေးကြီးတဲ့ အချက်များ)
မိမိရဲ့ ပြောဆိုဆက်သွယ်တဲ့ပုံစံတွေ တိုးတက်လာဖို့အတွက် ခုပြောပြမယ့်အချက်လေးတွေကို လိုက်နာသင့်ပါတယ်။
👂တက်ကြွစွာနားထောင်ခြင်း
တက်ကြွစွာနားထောင်ခြင်းဆိုတာက သင်နဲ့ဆက်သွယ်နေသူရဲ့ ပြောစကားကို အာရုံစိုက် နားထောင်ခြင်းဖြစ်ပါတယ်။ တက်ကြွစွာ နားထောင်သူတွေက ပတ်၀န်းကျင်ရှိလူများကို လေးစားမှုရှိတာကြောင့် လုပ်ဖော်ကိုင်ဖက်တွေရဲ့ အသိအမှတ်ပြုတာကို ခံရစေပါတယ်။
📞ပရိတ်သတ်နဲ့ လိုက်လျောညီထွေရှိတဲ့ ဆက်သွယ်ရေးပုံစံနည်းလမ်းများ အသုံးပြုနိုင်ခြင်း
မတူညီတဲ့ အခြေအနေ အမျိုးမျိုးအတွက် ကွဲပြားခြားနားတဲ့ ဆက်သွယ်ရေးပုံစံနည်းလမ်းတွေကို သင့်လျော်အောင် အသုံးပြုနိုင်ပါတယ် ဥပမာ – စာဖြင့်၊ စကားဖြင့်၊ အမူအရာဖြင့်။ ဆက်သွယ်မှုစွမ်းရည်ကို အကောင်းဆုံးအသုံးပြုနိုင်ဖို့ သင်နဲ့ ပြောဆိုဆက်ဆံမယ့်လူရဲ့ ထိရောက်တဲ့ ဆက်သွယ်မှုနည်းလမ်းကို ထည့်သွင်းစဉ်းစားဖို့ လိုအပ်ပါတယ်။
🧑🤝🧑ရင်းနှီးဖော်ရွေမှုရှိခြင်း
ရိုးသားမှုနဲ့ကြင်နာမှုက ရင်းနှီးဖော်ရွေမှုရဲ့ လက္ခဏာတွေဖြစ်တာကြောင့် ယုံကြည်မှုနှင့် နားလည်မှုကို တိုးပွားစေပါတယ်။ ရင်းနှီးဖော်ရွေမှု၊ ဂရုစိုက်မှု၊ ကြင်နာမှုစတဲ့ အရာတွေရှိဖို့ လိုအပ်ပါတယ်။
💯မိမိကိုယ်ကိုယုံကြည်မှု ရှိခြင်း
မိမိကိုယ်ကို ယုံကြည်မှုရှိခြင်းက မိမိနဲ့ဆက်သွယ်ပြောဆိုတဲ့သူတစ်ယောက်အတွက် သက်တောင့်သက်သာရှိစေ ပြီး ပြောဆိုရလွယ်ကူစေပါတယ်။
✍️ဝေဖန်အကြံပြုချက်တွေကို လက်ခံနိုင်ခြင်းနဲ့ အခြားသူများအပေါ်လည်း အပြုသဘောဆောင်တဲ့ အကြံပြုချက်များပေးခြင်း
ဆက်သွယ်ပြောဆိုရာမှာ ကျွမ်းကျင်သူတွေ၊ မိမိနဲ့ ဆက်သွယ်ပြောဆိုနေသူတွေကပေးတဲ့ ဝေဖန်အကြံပြုချက် တွေကို လက်ခံနိုင်စွမ်းရှိပြီး အခြားသူများအပေါ်လည်း အပြုသဘောဆောင်တဲ့ အကြံပြုချက်တွေပေး နိုင်ပါတယ်။
🤝စာနာစိတ်နှင့် လေးစားမှုရှိခြင်း
စာနာစိတ်နဲ့လေးစားမှုရှိခြင်း က အခြားသူရဲ့ခံစားချက်ကို နားလည်ရုံသာမက စိတ်ခံစားမှုများပါမျှဝေနိုင်ပါတယ်။
🙋 ရှင်းလင်း နားလည်လွယ်တဲ့ ခန္ဓာကိုယ်ဘာသာစကား (Body language)နဲ့ အမူအရာများသုံးတတ်ခြင်း
ခန္ဓာကိုယ်ဘာသာစကား (Body language)၊ မျက်နှာအမူအရာနဲ့ မျက်လုံးချင်းဆက်သွယ်ခြင်း အစရှိတဲ့ အသံမဲ့ ဆက်သွယ်ခြင်းများကလည်း ကောင်းမွန်တဲ့ ဆက်သွယ်မှုများ ဖြစ်ပေါ်နိုင်ပါတယ်။
ဒါဆိုရင် ပြောဆိုဆက်သွယ်တဲ့ပုံစံတွေ တိုးတက်လာဖို့အတွက် ဘယ်လိုလုပ်သင့်သလဲဆိုတာကို ခုပြောပြတဲ့ အကြောင်းအရာလေးကို ကြည့်ပြီး နမူနာယူကြရအောင်။
ချောစု၊ ဖူးဖူးနဲ့ အိ တို့သူငယ်ချင်းသုံးယောက်ရှိကြတယ်။ သူတို့ သုံးယောက်က ဘယ်သွားသွား အမြဲတတွဲတွဲ ရှိကြတယ်။ တစ်ရက်မှာ ချောစုနဲ့ ဖူးဖူးက သူတို့ကြည့်တဲ့ ကိုရီးယားဇာတ်လမ်းထဲက အကြောင်းကို ပြောနေကြတယ်။ အိကတော့ ကိုရီးယားဇာတ်လမ်းမကြည့်သူတစ်ယောက်ဖြစ်တယ်၊ ချောစုနဲ့ဖူးဖူးက သူငယ်ချင်းသုံးယောက်ဆုံတိုင်း ဇာတ်ကားအကြောင်းပဲအမြဲပြောနေတဲ့အခါ အိက ချန်လှပ်ထားသလိုခံစားရလာတယ်။ အဖွဲ့ထဲမှာ ဘောင်မဝင်တော့တဲ့ ခံစားချက်မျိုးရလာတယ်။ နောက်တစ်ရက်မှာ သူငယ်ချင်းတွေချိန်းတဲ့နေရာကို အိ က မလာတော့ဘူး။ အဲ့ဒီလိုနဲ့ ၃ ရက်လောက်မလာတော့တဲ့အခါ ဖူးဖူးနဲ့ ချောစုက အိ မလာရတဲ့အကြောင်းကို သတိထားမိလာကြတယ်။ ဒါကြောင့် ဒီအခြေအနေကို ပိုကောင်းအောင် အိနဲ့ အဆက်အသွယ်လုပ်ပုံတွေ ပိုကောင်းအောင်လို့ ဖူးဖူးနဲ့ချောစုတိုင်ပင်ခဲ့ကြတယ်။ အိ ကို မုန့်စားဖို့တစ်ရက်ချိန်းဆိုလိုက်တဲ့အခါ အိရောက်လာတယ်။ ဖူးဖူးနဲ့ ချောစုက တိုင်ပင်ထားတဲ့အတိုင်း အိကို ချိန်းထားတာမလာတဲ့အတွက် စိုးရိမ်ကြောင်း စကားတွေပြောတယ်။ ပြီးရင် အိ ပြောတာကို သေချာနားထောင်ပြီး အိ ဘာကြိုက်တတ်လဲ။ အိ ခုတလောဘာတွေလုပ်ဖြစ်လဲ စသဖြင့် မေးပြီး အိကြိုက်တဲ့ထဲက အကြောင်းအရာတစ်ခုကို ဆွေးနွေးကြတယ်။ အိ ကို စကားတွေပိုပေးပြောပြိး ချောစုနဲ့ ဖူးဖူးက ပိုနားထောင်ပေးဖြစ်ကြတယ်။ အိ က သူသဘောကျတဲ့အကြောင်းအရာကို ပြောရတဲ့အတွက် ပျော်ပြီး ဖူးဖူးနဲ့ ချောစုကို အများကြီး ရှင်းပြပေးတဲ့အခါ အိ လည်း စိတ်သက်သာရသွားတယ်။ အဲ့ဒီ အခါ ဖူးဖူးနဲ့ ချောစုက အိ ကို ချန်လှပ်ထားတာမဟုတ်ကြောင်းနဲ့ သူတို့နဲ့အတူ ဇာတ်ကားအတူတူကြည့်ဖို့ ဖိတ်ခေါ်တယ်။ အိ လည်း ဖူးဖူးနဲ့ ချောစုပြောတဲ့အတိုင်း မိမိစိတ်မဝင်စားပေမဲ့ အပျော်အနေနဲ့ ဇာတ်လမ်း ၁ ခုလောက်လိုက်ကြည့်မယ်လို့ပြောပြီး သူငယ်ချင်း သုံးယောက် အရင်လိုပဲပြန်အဆင်ပြေသွားခဲ့တယ်။
ဒီအကြောင်းအရာလေးကိုကြည့်မယ်ဆိုရင် ပြဿနာက ဘာဖြစ်နေတာလဲဆိုတာကို သတိထားမိသလို သူငယ်ချင်းတွေကြားမှာ ပြောဆိုဆက်သွယ်တဲ့ပုံစံတွေက လိုအပ်နေတယ်။ နားထောင်ပေးဖို့နဲ့ ရင်းနှီးဖော်ရွေပေးဖို့လိုအပ်နေတယ်ဆိုတာကို သတိထားမိတဲ့အခါ ပြဿနာကို ဖြေရှင်းရလွယ်ကူသွားတာကို တွေ့နိုင်ပါတယ်။ ဒီအကြောင်းအရာလေးကို ကြည့်ပြီး ဘယ်လို ပြောဆိုဆက်သွယ်မှုပုံစံတွေက ထိရောက်ပြီး ပြဿနာကိုပြေလည်နိုင်သလဲဆိုတာကို သိရှိသွားမယ်လို့ယူဆပါတယ်။